حبيت نذكر الوخيان ألي يكتبولنا في البرامج متع الأحزاب السياسية اللي بداو يهبطوا بشوية بشوية هالأيمات وأنو مهمتهم الأساسية طيلة عملهم في المجلس التأسيسي في صورة ما تحصلوا على مقاعد بش تكون إعادة صياغة الدستور قبل الحكم وتصريف الأعمال وانو حتى لو كانوا - كيف ما قاعدين يكتبوا في برامجهم - قادرين بش يخلقو كذا ألف موطن شغل وإلى قادرين يحققوا النسبة الفلانية متاع النمو الإقتصادي فإنو هذا ما يسمحلهمش بش يخنتبو اش يحبوا فالدستور ومذابيهم يحتفظوا بوعودهم في مجال الإعجاز الإقتصادي ويركزولنا على شنوا ناويين يحطوا في الدستور.
مذابيا نهار نحل التلفزة وإلا الراديو نلقا نقاش على مشروع دستور وموش زوز سرادك يعوعشو علينا
حبيت زادة نلفت نظر الوخيان اللي بش ينتخبوا 24 أكتوبر : ما تغركمش وعود من نوع نقضيو على البطالة ونوليو سويسرا متاع إفريقيا إلخ .. إلخ .. اسألوا الطرف اللي ناويين تسوطلو- حزب كان أو مستقل - على مشروع الدستور اللي داخل بيه للمجلس التأسيسي
سيب سمير
سمير الفرياني موضف في وزارة الداخلية التونسية، تجرأ وأعطى تصريح لجريدة "الخبير" ونشر فيها زوز رسائل حكى فيهم على تجاوزات قاعدة تصير في الوزارة اللي يخدم فيها وفسر اللي مازال ثمة كوادر في الداخلية مازلوا يمارسو في القمع ويخدموا بالأساليب "القديمة"، الشيء اللي أدى لإعتقالو حسب تصريح وزارة الداخلية بتهمة المساس بأمن الدولة.
اليوم تعدى أكثر من أربعين يوم والعائلة متاعو ما عندها عليه حتى خبر بخلاف تصريح وزارة الداخلية بأنو موقف.
أنا واحد من الناس يضهرلي وانو إذا كان فما واحد قاعد يمس بأمن الدولة، فهي وزارة الداخلية بدها بهل ممارسات القمعية واللا إنسانية لأنو حتى في صورة ما سمير الفرياني يتبلا عليهم، كان بالإمكان التعامل مع الوضعية متاعو في إطار إحترام القانون وأبسط حقوق الإنسان.
برشة أصدقاء يلومو علي كيف نقلهم راهي "ثورة مش بالعاني" وراهو ما تبدل شي تقريبا بالمقارنة مع عهد "صانع التغيير"، على الأقل في ما يتعلق بممارسات أجهزة الدولة ولكن الحالة متع الفرياني - وللأسف - تأكد كلامي. أنا واعي وأنو الممارسات هذي مش بش تتبدل في فترة قصيرة وهذي حالة طبيعية، ولكن الخطر هو وإنو برشة من الناس قاعدين يتعاملو معها على أساس انو كل شي تصلح.
عمري ما كنت نتصور روحي اجي نهار ندافع على بوليس، وبالخصوص في المدونة متاعي لأني نكره ألراطسة الكلبة متاعهم منين هبو و دبو، أما الله غالب، ثورة ههههه
سيبو سمير خيرلكم لا يوليلكم بطل جديد (إن لم يكن فعلاً)
Inscription à :
Articles (Atom)
Articles
