حوار بين أبو العباس و أبو بشار

أبو العباس و أبو بشار زوز صحاب, و ها الأسامي ماهي الا أسماء استعارية كانو يطلقوها على رواحهم من وقت اللي كانو يقراو في العراق معا بعضهم وقت اللي كانو شباب و وقت اللي كان الشباب شباب ..يا حسرة
في ما يلي حوار وجيز دار ما بيناتهم وهوما كهول على عتبة الشيخوخة

تليفون أبو بشار يرن, يسمع منه صوت عزف عذب جميل
- أبو العباس: أشنوة أبو بشار .. عامل عوادجي في تليفونك ؟
أبو بشار: كيفاش توا يا أبو العباس, ماعادش تفرق بين العود و القانون ؟
- اه صار هذا صوت قانون, أنا ضهرلي كأنوغاص شويه, عاطي على الضرب بالعود
-لا لا يا أبو العباس, ماهوشي ضرب بالعود, تي شد زيد تصنت, توا تتأكد اللي هو قانون
-اسمع يا سيدي اه, والله عندك حق
- هاذاكا لواش مازال يصلح حتى هو القانون, كان باش يعزفو عليه, ومع ذالك,مازال الناس يخلطو بينو وبين الضرب بالعود
- يا خويا الله غالب, أنا واحد من الناس, العود يستهوني أكثر, هاذاكا علاش كل ما نسمع قانون, يجي في بالي العود وراهو والله برشا عباد موش كا ن انا يا أبو بشار عندي حالة اللخبطة هاذي بين العود و القانون
- صحيح, اكثر الناس اللي سمعو السونوري صارتلهم هاللخبطة هاذي, هيا تعرفشي كيفاش, الله لا تجعلني جرة, هاو توا انحي والديه أنا سي القانون و نحطلكم العود ما دام الشعب الكل يستهويه العود و صوت القانون يعملو لخبطة
- لاا حول و لاا قوة الا بالله
-أشنوة زادة أبو العباس..؟
- أنا توة فهمت علاش القانون موش لاقي حظو مقارنة بالعود
- علاش يا سيدي اه ؟
-على خاطر الكعبتين و كعبة اللي يحبو القانون, فيسع ما يسيبوه و يطيحو للعود كي وخيانهم
- هاهاها, هاذي غلبتني بيها يا أبو العباس
- هيا امالا رجعلنا القانون, و أعطيني حتا أنا هاك السونوري, يزيني طبت من العود ونحب نسنس وذيناتي على صوت القانون

نتمنى اللي أنتوما زادا طبتو مل العود كيف سي أبو العباس, و راهو مازال الوقت باش نسنسو وذيناتنا على صوت القانون
و هاذية السونوري متاع أبو بشار للعباد اللي قعدت متشوقة تحب تسمع السونوري باش ما يروحوش بلاش و للعباد الأخرى زادة اللي فهمو كلام أبو العباس باش نجعهم على أنهم ما يتصرفوش كيف ما كان باش يتصرف أبو بشار